لو عندك امتحان غدا ماذا تفعل؟

[دكتور حتى]

[align=center][align=justify][align=center]الإمتحان قالوا لك انه غدوة
ماذا تفعل؟
لو كان تحريري ؟
ولو كان شفوي؟
ولو كان سريري؟


فيه طلبة :
التحريري اوMCQ مايفكروا ولا يشغلوا دماغهم فيه عادي
واول مايلاقوا انهم حيدخلوا الامتحان السريري او الشفوي
يبدوا عاد في التفكير وقلة الراحة واما دكتور حيمتحنني وشنو بنلبس؟ وووو
وفيه ناس تشد الكتاب وماتنحيه من يديها الي عتبة غرفة الامتحان
وفيه ناس تبدا تصلي وتسبح
وفيه اللي يبكي ويقول انا دماغي مافيه ولا معلومة
وفيه ناس تخرج تتفسح ولا تفتح فيلم او تزور اقارب حتى تغير الجو

ماذا تفعل انت؟[/align][/align][/align]

سلامات

[الزهراوي]

نكسد نقرأ مش الشباب
لأني لو قعدت بروحي حيجيني اكتئاب لكن لما نكونوا جماعة وداعا للإكتئاب ونقعدوا نقروا
لحد ما نصلوا الفجر جماعة بعدين نمشوا للإمتحان
ولله الحمد وفقنا الله في كل امتحانات هذه السنة
يوجد مقولة تقول أن الإكتئاب معدي ( أني مش مقتنع بيها ) لأنك لما تكون بروحك تكتأب أكثر
موفقين جميعا ان شاء الله
تحياتي

[خيرالله خيرالله]

أعتقد أنني لو كنت مش متهيأ للإمتحان أكيد أكيد رح أمسك الكتاب و كلي تأمل بين صفحاته لعلها تلتصق معلومة أجاوبها في الإمتحان

هذا بالنسبة لي الحل الوحيد

خيرالله خيرالله

[karamella]

[gdwl]انا خلال العام نحاول نكتب ملخصات سريعة ونراجعها قبل دخول اي امتحان مرور سريع ونتوكل على الله ..[/gdwl].ســلام

[عاشور قلب الاسد]

معنديش امتحانات ... مكمل قرايتى



لووووووووووول

[RANDA]

انى ع العكس تمام

مانخافش من الامتحان بكل نحضرله ونقر قبله بفتره وليلعه الامتحان نرقد عمرى ما سهرت

وفى الكليه فى الصبح قبل الامتحان مانحبش نراجع

ونخش اول وحده للامتحان العملى والشفوى ومانيش عارفه علاش اغلب الطلبه مايخشوش معاى

يقال انى ندوى هلبا مع الدكتور والاسئله كلها نجاوبها والحمد لله

واكتر طالبه الدكتور يطول معاى فى الامتحان

لكن سهر ليله الامتحان ماعنديش

ودوشه الصبح قبل الامتحان ماعنديش

غريبه شويه انى

[Dr Shamma]

السلام عليكم ورحمة الله وبركاته
مشاعري قبل يوم الامتحان,خليط من البكاء الشديد(مش خايفه من الدكاتره أو الامتحان نفسه ,لكن غالبا لأنى نكون ماقريتيش باهى ونخاف موت من حاجه اسمها رسوب ,لكن الحمد لله صفيت من الدور الاول فى سنوات الطب كله لين اتخرجت الحمد لله),طبعا البكاء يزيد لما ندعى الله سبحانه وتعالي (طمعا ورجاءا )
لكن الفتره اللأخيره يعنى خامسه طب تحديدا (برود مش عادى جانى ) يعنى حساسيتى قلت قبل الامتحان وعادى نتفرج على التلفزيون والانترنت ,تقولوا ماعنديش امتحان بكل (لكن الحمد لله صفيتها بتقدير جيد)
ختاما من واقع تجربتى ,نصيحتى لكل شخص مقدم على الامتحان (خفف من توترك لأنه ماينفعش أبدا بالعكس يضرك,والدعاء وصلاة الفجر (سبحان الله تأثيرهم على نفسيتك وحتى على نجاحك )ولو مازال وقت الامتحان طبعا لازم تحضروا نفسكم من الأول وزى ماقالت أختى كاراميلا ,اكتبوا ملخصات حتى تراجعوا منها قبل الامتحان
بالتوفيق للجميع ان شاء الله

[Dr Shamma]

نسيت حاجه فكرتنى بيها أختى راندا
انى تخايلوا معظم امتحاناتى مانرقدش ليله الامتحان (ردوووووووووووو بالكم اديروا عملتى) كله بسبب النسكافيه اللى ناخد فيه بكميات رهيبه قبل الامتحان ,ونمشي الصبح ( أكيد متخايلين شعورى صح؟),لا والـتأثير السلبي يبدأ بعد توزيع أوراق الامتحان بربيع ساعه هكى(الظهر والرقبه متصلبين ونحس روحى نبي نبكى ,عيونى ودماغى مشوشين) ,لكن ديما نسهر ومانرقدش لانى معتقده انه لازم نكمل متلا قراية أسئله وكذا( طبعا أماليا لو كانوا زبطونى كانوا رقدونى بالسيف لكن كنت ربي يسامحنى نقوللهم اهو رقدت وهما يرقدوا من هنى وأنى نشعل الضى زعميتك بنكمل المنهج), أيضا من سلبياتى (مانفطرش لأنى نحس فى روحى بنرج.........!)
لكن من ميزاتى(لو ميزه فعلا),, (ديما يوم الامتحان سواء قاريه أو لا ,سهرانه أو راقده ,ديما الحمد لله نضحك وانكت للبنات ,واللي يشوفنى يحسابنى تامه القرايه ومهنيه على روحى),يوم الاورال والعملى (صح نبدا خايفه أول مانوصل ,لكن تعودت نمتحن أخر وحده ,بعد مانكون ضحكت وبكيت وتوترت ,يعنى ماعاد يأثر فيا شئ ,صارلي adaptation
ولما بنجى نحط رجلى على عتبة الباب (نسمى بالرحمن ونتوكل على الله ونسلم أمري ليه) والحمد لله نطلع راضيه وفرحانه

[الزهراوي]

بالنسبة للنسكافيه ليلة الإمتحان لازم منها
والكمية تتراوح بين 500 مليلتر الى كمية مجهولة
واللي تخليني مش قادر نفطر خوفا من الترجيـ.....
لكن توخيا للحذر معاك حبة MV + paracetamol+ librax وأحيانا omperazol
وتي العدة وما تنسى شيء
وما تنساش واحدة فاليوم كان جاء الإمتحان صعب وما قدرتش ترقد الليلة اللي بعدها من التفكير ( زعمة ننجح )
أي سؤال عن الإكتئاب خوكم موجود
مش بعيد نتخصص طب نفسي وبالتحديد في الإكتئاب لأنه كما يقال ( اسأل مجرب ولا تسأل طبيب , ولأتسأل طبيب بل اسأل من كان مريض )
تحياتي

[اسير الشوق]

خوي الزهراوي

في نوعين من الا متحانات


في أمتحان قاريله وملحق عليه هذا عليك وعلي النسكافيه


ولازم من طلعة ساعتين تغير جو القراية والضغط


وترجع تكمل


طبعا النوم زي الخلعة ترقد وتنوض مرعوش مرض بو رعاش متخصص متع امتحنات


أما بالنسبة لامتحان مش ملحق عليه تبدأ تضيع في الوقت تحاول لكن بالك فيه وتهيج وكانك محبوس


وفي الحالتين أفضل اختراع النسكافيه


أما كانك قاري نص نص خليك على الاسئلة




ومتنسوش تكثرو من الصلاة والدعاء وفجر الامتحان ديما حاضر